Aug 8, 2017

The Other Side of Me (Collaboration) جانب مختلف من حياتي


السلام عليكم

كيف حالكم؟ و كيف الإجازة حتى الآن؟



اليوم أنا متحمسة مرررة لأن هالموضوع هو تعاون جديد مع مجموعة كبيرة من البلوقرز اللي أحبهم و أثق فيهم و لأن التعاون بيكون مميز اخترنا له هالتاريخ المميز ٨\٨.. و فكرنا نشارككم جانب بعييييد عن التجميل اللي تعودتوا عليه منا.. بيكون عن أشياء غير تجميلية نحبها و نفضلها سواء بشكل دائم أو في الفترة الأخيرة.. بس قبل ما أبدأ خلوني أعرفكم بالبلوقرز المشاركات معي في التعاون:



و لازم بعد ما تخلصون قراءة موضوعي تروحون تشوفون موضوعاتهم و فيديوهاتهم عشان تتعرفون علينا أكثر و تشاركونا جانب جديد من حياتنا.. بس اضغطوا على الأسامي فوق و تمتعوا!


كنت بأبدأ بالقهوة بس أتوقع إنها معشوقة الجميع و أنا أولهم راح أخليها لموضوع ثاني بعدين لما أشتري ماكينة نسبريسو و ببدأ معاكم بلعبة صار لي ألعبها مممم ٤ سنوات يمكن؟ ما أفتكر بالضبط بس من زماااااان و اسمها Two Dots فيها مراحل كثيرة و في كل تحديث يضيفون لها مراحل زيادة و فيها تحديات تنزل لفترات مؤقتة ممتعة مرررة و فيه أدوات مساعدة أجمعها خلال اللعب.. مدري كيف أشرح لكم اللعبة باختصار لكن تقريبا هي عبارة عن ربط بين نقاط في عدد معين من الحركات و الحين وصلت للمرحلة ١٠١٠ و متحمسة مررررة للمراحل الجاية!! 


سماعاتي JVC Xtreme-Xplosivs برضو قديمة مرة و كان لونها أحمر ناصع بس لأنها عندي من ٧ سنوات أو أكثر و استخدمها كثير برا البيت مع الاحتكاك بالطرحة و العباية تغير لونها و صار عودي.. من يوم اشتريتها و أنا ما استخدم غيرها.. الصوت فيها بططططل ما شاء الله و جودتها عالية و تتحمل.. أتذكر أخذتها من إكسترا بحدود ٢٠٠ ريال عاد مدري للحين موجودة عندهم و لا لا لكن لقيتها لكم في أمازون لو حابين و يجي معها علبة صغيرة سوداء لكنها صغيرة مرة بالنسبة لي و لو كنت مستعجلة ما يمديني ألف السماعات زين و أدخلها جوا فصرت أحطها في هذي الشنطة الصوغننة من إتش أند إم.. و بصراحة أكررررررره لما تتقعد و تتداخل أسلاكها في بعض فلما أحطها بشكل مرتب في هالشنطة و بعدين في جيبي أو شنطة الدوام أو السوق أضمن تبقى بحال جيدة و بدون تعقيد! 


هذي معشوقتي في التصوير.. عدسة كانون 100mm الماكرو.. كل صوري الدقيقة و القريييبة في الإنستقرام اللي دايم تعجبكم تكون غالبا بهالعدسة.. اشتريتها بأول راتب لي في وظيفتي قبل ١٠ سنوات و كانت فرحتي فيها عارمة و للحين صامدة ما شاء الله و تبهرني في كل مرة أصور بيها



هذي المقلمية جديدة مرة لها تقريبا شهر عندي لكن حبيييييتتتتها و لازم أقول لكم عنها في هالموضوع.. كنت أدور مقلمية شفافة من فترة و لقيتها في فور إيفر ٢١ بـ ٣٠ ريال.. هي في الحقيقة شنطة مكياج لكن أنا خليتها للأقلام و هي بالطبيعة لونها فااااقع جدا و فيه منها أصفر و وردي لكن هاللون جذبني أكثر.. 



تفتكرون هذي الأقلام؟ أول ما عرفتها كنت في ثاني متوسط شفتها عند بنت اسمها فوزية.. هذي البنت في فترة وجيزة صارت صديقتي الصدوقة و للآن على تواصل معها و لو إنه قليل لكن الحمدلله ما انقطع.. المهم خطها الرقعة جمييييل ما شاء الله و تبهرني مرة لأن وقتها كان هالخط الحلو بس الكبار يعرفونه هههههههه.. كانت تستخدم هذي الأقلام و كنت أحسها تخلي الكتابة سلسة و الخط حلو.. خطي ما تحسن عليها طبعا مع الأسف الشديد خخ.. لكن أحب استخدمها بين فترة و الثانية و تذكرني بأيام الدراسة.. لقيتها في جرير علبة كاملة فيها كل الألوان اللي تشوفونها يمكن بـ٣٥..




كثير من الناس مهتمين استخدام الأجندة في السنتين الأخيرة و للبعض تعتبر الأجندة هواية تساعدهم على الاسترخاء خصوصا لما يقضون وقت ممتع في تزيين الصفحات و تلوينها و تنسيقها حسب المناسبات و المواسم.. أنا حاولت أندمج في موجة الأجندات لكن ما قدرت لكن اللي دايم أسويه من سنوات هو أشتري أي دفتر مسطر عادي يعجبني شكله و استخدمه لكل شي ممكن مثل أهم الأعمال اللي لازم أنجزها سواء في البيت أو المدرسة أو السفر أو للمدونة و الإنستقرام و أكتب أفكاري و أرسم فيه doodles بعد.. ما له تقسيم معين عندي كل ما امتلت صفحة قلبتها للثانية و هكذا.. المهم أختي جابت لي هذا الدفتر هدية ما أعرف من فين بالضبط.. جلد أسود و مطبوع عليه بالذهبي و من داخل مسطر زي ما أحب.. لسا جديد لكن راح أستخدمه قريب إن شاء الله 




الحاجة اللي ما يعرفها الكثير عني هو إن مشروبي المفضل على الإطلاق هو الموية.. و هالشي اكتشفته بعد سلسلة من التحاليل أيام المتوسط و الثانوي و اتضح عندي عيب خلقي بسيط في الكلية اليمنى و لازم أكثر من شرب الموية.. و يوم عن يوم صرت أحبها و استمتع فيها و خصوصا بعد ما قطعت المشروبات الغازية و قللت من المشروبات المعلبة و ما عندي خيارات باردة كثير.. و ما فيه ألذ من الموية في كوب آيكيا MJÖD العملاق هذا! عندي منه ٢ في بيتي و ١ في بيت أهلي لأنه كبير أعبيه مرة وحدة بموية باردة مرة و أرتاح من المشاوير للمطبخ ( كسولة خخ) و أتذكر مرة شافته بنت خالي و قالت لي وين غطا الجك هذا؟ هههههههههههه.. عاد الحلو في هالكوب إنه رخيص مرة بـ٧ ريال بس!!!! 




لو وصلتوا لهنا في القراءة فـ من جد شكرا لكم و خلاص باقي شوي و أخلص ههههه.. اللي عندها أطفال أكيد تعرف إنه مستحيل يكون عندها كيبورد نظيف مدة طويلة فـ أتمنى تتجاهلون هالشي خخ.. في الشهور الأخيرة صرت مدمنة فيديوهات الـ decluttering تعني التخلص من الأشياء الزايدة اللي تسبب الفوضى.. بلا مبالغة كل ما شفت نفسي فاضية فتحت يوتيوب و كتبت في البحث decluttering makeup و لا decluttering my house.. أحس بالحماس و أشوف كم شيء تخلصوا منه و كيف صار الوضع بعدها و مرات أقوم أرتب بعدها ههههههه.. و الشي الثاني اللي اشوفه ع اليوتيوب هي قناة تعتبر جديدة نوعا ما.. لكن أبهرتني ببراعتها في المكياج و حبيت أختم لكم الموضوع بقناتها: RawBeautyKristi


أتمنى يكون الموضوع أعجبكم و لا تنسون تشوفون بقية موضوعات و فيديوهات التعاون اللي حطيت لكم روابطهم في البداية..


لا تنسوني من دعاكم
PEACE


Aug 4, 2017

Benefit Boi-ing Collection مجموعة كونسيلرات بوينق الجديدة من بينفت


السلام عليكم جميعا

كيف حالكم و كيف الإجازة معاكم؟ إن شاء الله كل أموركم تمام..
اليوم بإذن الله راح أكلمكم عن مجموعة كونسيلرات Boi-ing بوينق الجديدة من بينفت.. في الحقيقة ٣ منها موجودين من قبل بس غيروا التعليب و الاسم و أضافوا نوع واحد جديد. أنا جربت منهم ثلاث أنواع و بأحكي لكم تجربتي معها بس في البداية خلوني أقول لكم إن هالاتي جدا غامقة و مو أي كونسيلر ينفع معاي و غالبا أحتاج مصحح بالذات في المناسبات المهمة أو الأيام الصعبة.. المجموعة كلها وصلتني من بينفت للتجربة و أرسلوا لي من كل الأنواع الدرجة رقم ٢


راح أبتدي بالنوع الجديد في هالمجموعة و هو Boi_ing Airbrush Concealer و هو نوع خفيف جدا و تغطيته بسيطة.. جربت أطبطبه بأصبعي بعدين أدمجه كالعادة بالبيوتي بليندر لكن ما عطاني التغطية الكافية لهالاتي.. اضطريت أحط مصحح برتقالي قبل و بعدين سويت نفس الطريقة و عطاني تغطية متوسطة.. و شفت في اليوتيوب وحدة تاخذ الكونسيلر من العلبة بالبيوتي بليندر علطول و تطبطب و حبيت الفكدة هذي خصوصا إن العلبة عريضة مرة و أقدر أمرر البيوتي بليندر عليها بالراحة.. و هذي أكثر طريقة عجبتني و عطتني تغطية كبيرة بس لازم لاااازم بودرة علطول عشان ما يخطط.. و ثباته مو قوي مرة ينفع للنهار أو الطلعات السريعة.. حبيته و الله.. 



النوع الثاني اللي جربته هو Boi-ing Brightening Concealer اللي كان اسمه زمان Erase Paste مكتوب إنه ينور المنطقة.. زي ما تشوفون هو وردي شوي و غالبا ينحط قبل الكونسيلر عشان يصحح الهالات لكن أرجع أقول لكم إن هالاتي لا تقهر هههههه.. هذا ما سوا لي شي أبدا!! لا تصحيح و لا تنوير و حتى لما حطيت بعده كونسيلر.. يمكن لو عندي الدرجة الأغمق رقم ٣ بيصير لها مفعول؟ مدري..



النوع الأخير اللي جربته اسمه Boi-ing Hydrating Concealer و كان اسمه زمان Fake Up هو أنبوب زي الروج فيه كونسيلر و مرطب.. و لأن نسبة الترطيب فيه عالية ما عطاني تغطية أبدا و يخطط تحت العين.. بس لأن علبته سهلة في الاستخدام بأخليه في شنطة المكياج اليومية أو في السفر عشان أحطه على وجهي بسرعة و أدمجه زي الأساس لو احتجت تغطية و شفت في اليوتيوب وحدة تحطه على شفايفها عشان يرطب و يخفف من الاسمرار قبل ما تستخدم الأرواج.. أنا لسا ما فتحت الجديد هذا و لا صورته لكم عن قرب لأني ما أحب افتح المنتجات إلا لما أنوي أستخدمها فعليا و رأيي فيه كان بناء على تجربتي لعينة منه وصلتني في قلام بوكس..


و بالتالي اللي لسا ما فتحته و لا جربته و لا صورته هو Boi-ing Industrial Strength Concealer اللي كان اسمه بوينق Boi-ing سابقا.. هو حسب التقارير في النت أكثرهم تغطية.. بمجرد ما أفتحه و استخدمه راح أحدث الموضوع و أحط لكم رايي إن شاء الله مع صورة أوضح..

التعليب الجديد بصراحة مررررة حلوووو فضي مطفي مع وردي.. منعش و عصري و هذا مو غريب على بينفت دايم تبهرنا في إخراج منتجاتها.. الأسعار ما عندي فكرة واضحة عنها بس إذا نفس الأسعار القديمة بيكون المنتج الواحد بين ١٣٠ و ١٥٠ ريال تقريبا 

شكرًا لكم على القراءة و تسعدني تعليقاتكم و لو عجبكم الموضوع و حابين تشاركونه تلاقون أيقونات وسائل النشر على مواقع التواصل موجودة تحت ع اليمين..

و لا تنسوني من دعاكم

PEACE 

© ●terter thinks● | All rights reserved.
BLOG TEMPLATE HANDCRAFTED BY pipdig